في سوق الكراهب المستعملة، زوز مشاكل يتعاودوا برشا: compteur trafiqué (كيلومتراج متنقّص) وكرهبة مضروبة تتباع على أساس "ما مسّها حدّ". الزوز يخلّيوك تخلّص أكثر من القيمة الحقيقية، والثاني ينجم يأثّر على الأمان متاعك ومتاع عايلتك. في هالمقال باش نوريك العلامات اللي تنجم تشوفها بيدك، وشنوّة يكشف الـ diagnostic avant achat اللي ما يبانش بالعين.
علاش الكيلومتراج مهم برشا؟
الكيلومتراج هو من أوّل الحاجات اللي تحدّد سوم الكرهبة. كرهبة بـ 120 ألف كيلومتر موش كيف كرهبة بـ 250 ألف، لا في السوم لا في المصاريف الجاية: courroie de distribution، embrayage، amortisseurs، turbo... كل قطعة عندها عمر. كي يكون الكونتور متنقّص، تحسب روحك شريت كرهبة "شابّة" وانت في الحقيقة شريت كرهبة تحب مصاريف كبار قريب.
علامات بالعين تخلّيك تشكّ في الكيلومتراج
- الـ volant: مملّس ولا الجلد متآكل برشا في كرهبة كونتورها صغير.
- الـ pédales: الكاوتشو متاع الفرانة والـ embrayage ممسوح ولا تبدّل جديد.
- الكرسي متاع الشيفور: مطبوس ولا القماش ممزّق في الجنب.
- الـ levier de vitesse: الـ pommeau ممسوح ولا تبدّل.
- الأوراق: فاتورات صيانة ولا visite technique فيها كيلومتراج أكبر من اللي في الكونتور.
- الـ étiquette متاع الـ vidange تحت الكابو ولا في الباب: كيلومتراج مكتوب أكبر من الكونتور.
كل علامة وحدها ما تكفيش باش تحكم، أما كي يتجمّعوا برشا، لازم تتثبّت أكثر.
شنوّة يكشف الـ diagnostic في الكيلومتراج؟
الكيلومتراج في الكراهب الحديثة ما يتسجّلش في الكونتور برك. برشا calculateurs يحفظوا معلومات فيها كيلومتراج ولا تتربط بيه: calculateur moteur، boîte automatique، ABS، وفي بعض الماركات حتى الـ clé. كي نقراو هالمعلومات بالـ valise، ننجّموا نقارنوها مع الكونتور. كي يكون فمّا فرق كبير ولا تناقض، هذي علامة قويّة إنّ الكونتور تمسّ.
طبعاً، حتى الـ diagnostic عندو حدود: فمّا كراهب ما تحفظش برشا معلومات، وفمّا تلاعب متطوّر. أما كي نجمعوا الـ valise مع حالة الكرهبة ومع الأوراق، الصورة تولّي واضحة برشا.
كيفاش تعرف الكرهبة مضروبة؟
علامات بالعين
- فرق في اللون بين porte وaile ولا capot، يبان أكثر في الشمس.
- Jeu موش متساوي بين القطع: الفراغ بين الـ capot والـ aile ولا بين الأبواب موش كيف كيف.
- Boulons محلولين: آثار clé على الـ vis متاع الـ ailes ولا الـ capot ولا الأبواب.
- Peinture على الـ joints ولا على الكاوتشو.
- Soudures ولا آثار تصليح في الـ longerons تحت الكابو ولا في الكوفر.
- Phares واحد جديد وواحد قديم.
شنوّة نزيدوا نتثبّتوا فيه
في الـ check-up متاعنا نتثبّتوا في الـ carrosserie والـ peinture نقطة بنقطة، ونقراو الـ calculateur متاع الـ airbag: كي يكون الـ airbag تفرقع قبل، ساعات يبقى أثر ولا défaut في الميموار. ونشوفوا الـ direction والـ suspension: كرهبة مضروبة قوي ساعات تجبد لجنب ولا العجلات تتآكل بطريقة غريبة.
ضربة خفيفة ولا accident كبير؟
موش كل peinture تعاودت معناها مصيبة. خدش ولا ضربة parking صغيرة تتصلّح عادي وما تأثّرش على الأمان. المشكل الحقيقي هو الـ accident اللي مسّ الهيكل (châssis، longerons، piliers) ولا اللي فرقع الـ airbags. هاذي كرهبة تنجم تكون أضعف في accident آخر، وسومها لازم يكون أقل بكثير. التقرير متاعنا يفرّق بين الزوز باش تعرف شنوّة قدّامك.
كيفاش تحمي روحك قبل ما تخلّص
- اطلب الأوراق والفاتورات متاع الصيانة.
- شوف الكرهبة في الضوء متاع النهار، موش في الليل ولا في المطر.
- اعمل diagnostic avant achat قبل ما تعطي حتى avance.
- استعمل التقرير في التفاوض: كيلومتراج مشكوك فيه ولا accident = سوم أقل، ولا تمشي.
كرهبة تغرّقت ولا تعدّت في الماء
فمّا فخّ ثالث أقل انتشاراً أما خطير: الكرهبة اللي تعدّت في الفيضانات ولا تغرّقت جزئياً. الماء يدخل للفيشات والـ calculateurs والـ moquette، والمشاكل الكهربائية تبدا تطلع بالشوية بعد أسابيع ولا أشهر. العلامات: ريحة رطوبة ولا ريحة "معفّنة" في الداخل، صدأ تحت الكراسي وعلى الـ rails، طين ولا رمل في بلايص غريبة كيما تحت الـ moquette ولا في الـ roue de secours، وضباب داخل الـ phares. في الـ diagnostic، برشا codes كهربائية في calculateurs مختلفة في نفس الوقت تنجم تكون علامة على مشكل ماء. كي نلقاو هالعلامات مجموعين، ننصحوك بالواضح ما تشريش، ولا على الأقل تكون عارف شنوّة قدّامك.
أسئلة لازم تسألها للبيّاع
- من وقتاش عندك الكرهبة؟ وقدّاش من مالك قبلك؟
- وقتاش تبدّلت الـ courroie de distribution؟ عندك فاتورة؟
- الكرهبة ضربت قبل؟ وين وكيفاش تصلّحت؟
- علاش تبيع فيها؟
- تقبل نعملوا diagnostic قبل ما نتّفقوا؟
الأجوبة، وطريقة الجواب، يقولولك برشا. والبيّاع الصادق ما يخافش من الفحص، بالعكس يعاونو يبيع أسرع.
شنوّة تعمل كي تلقى مشكل بعد ما شريت؟
كي تكتشف الحقيقة بعد البيعة، حظوظك تولّي صغيرة. البيّاع ينجم يقول "الكرهبة بعتهالك كيما هي"، والإثبات يولّي صعيب. هذا علاش الوقت الوحيد اللي عندك فيه قوّة هو قبل ما تخلّص. الفحص قبل الشراء ما ياخوش برشا وقت ولا فلوس، أما يحميك من خسارة تنجم تكون كبيرة برشا.
الخلاصة
الـ compteur trafiqué والـ voiture accidentée هوما أكثر زوز فخوخ في شراء كرهبة occasion في تونس. العين تعاونك، أما الـ diagnostic avant achat بالـ valise والفحص الكامل هو اللي يعطيك الحقيقة. قبل ما تشري، كلّمنا على 27 315 414 ولا WhatsApp 27 633 756.
